*आरंग मे छत्तीसगढ़ी दिवस के होइस आयोजन*
*आरंग मे छत्तीसगढ़ी दिवस के होइस आयोजन*
आरंग
आरंग के बहुचर्चित स्कूल सृजन सोनकर विद्या मंदिर उच्चतर माध्यमिक विद्यालय म छत्तीसगढ़ी राजभाषा दिवस के बेरा म छत्तीसगढ़ी दिवस के आयोजन करे गिस। जेमा लईका मन ल छत्तीसगढ़ी भाषा के महत्व के विषय में जानकारी दे गिस। जेमा स्कूल के लईका मन छत्तीसगढ़ी गीत ,कविता और भाषण ले छत्तीसगढ़ के महत्ता ल बताईस ।
ये बेरा म स्कूल के प्राचार्य श्रीमती यशोदा योगी ह कहिन कि छत्तीसगढ़ बने 22 बछर होगे जउन अपन बिकास में रोज आगू बढ़त हे अउ कोनो राज के आगू बढ़े म सबसे बड़े अधार ओकर भाखा होते। जउन राज अपन भाखा म जतका आगू रथे ओहा ओतके बिकास करथे। प्रधान पाठक श्रीमती भारती वर्मा कहिन की हमन ल हर भाखा बर मया रखना हे फेर छत्तीसगढ़ी भाखा बर तो मया ल काभू कम नइ करना हे । जउन राज म हमर जनम होय हे जेन ह हमर पालन पोषण करत हे ओकर उपयोग करना हमर धरम आए । 12वीं के लईका लवली बघेल ह बतइस कि कइसे हमन अपन किस्सा कहानी के माध्यम से अपन जिनगी के रद्दा ल संवार सकत हन, अनमोल ठाकुर ह बताइस कि 28 नवंबर 2007 के राजभाषा आयोग के गठन होइस जे पाय के हर बछर राजभाषा दिवस मनाथन तेकर संगे संग मुकुंद कौशल जी के गीत मोर भाखा संग दया मया के सुघ्घर हवे मिलाप रे,,,के प्रस्तुति दिस। शाला नायक अश्वनी देवांगन अपन गोठ के माध्यम से बताइस कि हमन ल छत्तीसगढ़ी म पढ़ना लिखना आना चाही काबर की अब के बेरा में बड़े-बड़े परीक्षा मां घलो छत्तीसगढ़ी के कइ प्रश्न आथे ओला जानना समझना घलो जरूरी हे। सांस्कृतिक प्रभारी चेतन सिंह चौहान हर बताइस कि राजभाषा ल बने आज 15 बछर होगे फेर आज तक हमर छत्तीसगढ़ी बर ठोस बुता नइ होवत हे। ह कतको कागज पाथर म चलत हे अउ अपन मानक रूप बर लड़त हे। आज तक राजभाषा आयोग म तीन झन भर अध्यक्ष बन पाय हे पहली अध्यक्ष श्यामलाल चतुर्वेदी जी दूसर अध्यक्ष दानेश्वर शर्मा जी अभी तीसर विनय कुमार पाठक जी बनीस 2018 के बाद से आयोग म अब तक अध्यक्ष नइ बनाय गेहे ये बढ़ चिंता के विषय हे । राजभाषा के कारज राजभाषा ला आठवीं अनुसूची में जगह देवाना, राजभाषा बनाना और तीन भाखा सूत्र के रूप में पढ़ई में जोड़ना हे।अभी एक दु बने बुता होवत हे जेमा छत्तीसगढ़ी भाखा के समृद्धि बर माई कोठी योजना , अउ बिजहा योजना छत्तीसगढ़ सरकार चलावत हे जेमा छत्तीसगढ़ी के पुस्तक मन के खरीदी अउ छत्तीसगढ़ी भाखा ल सकेले के उदिम करे हे जेकर ले हमर भाखा पोठ हो जाही । येकर संगे संग हमन ल अपन गोठ बात म जादा ले जादा छत्तीसगढ़ी ला सामिल करे बर परही।तभे हमर छत्तीसगढ़ी भाखा अउ साहित्य ल सम्मान मिल पाही।
ये बेरा म इस स्कूल प्रबंध समिति के संरक्षक लखनलाल सोनकर, अध्यक्ष छत्रधारी सोनकर, उपाध्यक्ष गजेंद्र सोनकर, कोषाध्यक्ष देवेंद्र सोनकर, सचिव सूरज सोनकर ,सह सचिव सियाराम सोनकर सहित स्कूल के जम्मो गुरुजी मन अउ सबो लईका मन उपस्थित रिहीस।
